Fram vann magnaðan 4-1 sigur á Val í 15. umferð Bestu deildar karla í Úlfarsárdal í kvöld og á sama tíma unnu Íslands-og bikarmeistarar Víkings 5-1 sigur á HK í Víkinni.
Veðuraðstæður í Úlfarsárdal settu sinn svip á leikinn. Rok og rigning voru aðstæður dagsins og byrjuðu Framarar með vindinn í bakið.
Framarar fóru vel af stað. Það tók aðeins tíu mínútur að fá fyrsta markið en það var smá heppnisstimpill yfir því. Már Ægisson átti skot við D-bogann, boltinn af Herði Inga Gunnarssyni og yfir Frederik Schram í markinu.
Heimamenn fengu vítaspyrnu fimmtán mínútum síðar. Bjarni Mark Duffield reif Má Ægis niður í teignum og var það Fred Saraiva sem fór á punktinn og skoraði.
Þeir hömruðu járnið meðan það var heitt. Kennie Chopart var næstur í röðinni. Markið kom sex mínútum eftir vítaspyrnuna, en hann fékk að vaða upp allan völlinn áður en hann hamraði boltanum í fjærhornið. Varnarleikur Vals ekki upp á marga fiska.
Patrick Pedersen tókst að minnka muninn á 39. mínútu. Kristinn Freyr Sigurðsson sendi boltann á Patrick sem setti boltann í netið.
Valsmenn voru með vindinn í bakið í þeim síðari en náði ekki að nýta hann jafnvel og Framarar.
Sóknarþunginn var gríðarlegur. Tryggvi Hrafn Haraldsson átti tilraun í stöng þegar tæpar tvær mínútur voru liðnar af síðari hálfleik og hjálpaði vindurinn aðeins til þar.
Valsmenn voru allt í öllu en Ólafur Íshólm Ólafsson, markvörður Fram, var með allt í teskeið. Hann varði frábært skot Gylfa Þórs Sigurðssonar og síðan skalla Patrick eftir hornspyrnu Gylfa. Sá var í essinu sínu.
Jakob Franz Pálsson átti þá gott skot að marki á 64. mínútu en aftur varði Ólafur frábærlega.
Framarar gerðu út um leikinn á 72. mínútu. Kennie var með boltann í vítateig Fram, kom honum á Má sem skaust upp völlinn. Hann lék á einn Valsara áður en hann kom boltanum á Fred. Hann lék á annan varnarmann áður en hann gerði fjórða markið og síðasta naglann í kistu Vals.
Frábær 4-1 sigur Fram staðreynd. Fram er með 22 stig í 7. sæti en Valur í 3. sæti með 28 stig og missti þarna af góðu tækifæri til að komast upp fyrir Blika og í annað sætið.
Íslandsmeistararnir unnu sannfærandi sigur á HK
Víkingur hafði sigur gegn HK, 5-1, í Víkinni í kvöld.
Heimamenn voru stálheppnir að lenda ekki undir eftir tólf mínútna leik. George Nunn átti fyrirgjöf á Birni Breka Burknason sem skallaði átt að marki. Ingvar Jónsson, markvörður Víkings, virtist verja boltann í slá áður en Víkingar björguðu á línu.
Meistararnir voru fljótir að refsa. Í næstu sókn kom Karl Friðleifur Gunnarsson boltanum á Nikolaj Hansen sem skoraði.
Gestirnir skoruðu sanngjarnt jöfnunarmark fimm mínútum síðar. Atli Þór Jónasson lék á Ingvar í markinu og sendi síðan boltann fyrir markið og þar kom Nunn og kláraði.
Víkingar tóku völdin eftir það. Hansen gerði annað mark sitt á 39. mínútu. Danijel Dejan Djuric kom boltanum á Niko sem náði að renna sér í boltann. Stefán Stefánsson varði boltann, en Niko fékk hann aftur í sig og í netið.
Heimamenn héldu áfram að sækja og kom þriðja markið rétt áður en flautað var til loka fyrri hálfleiks. Gísli Gottskálk Þórðarson kom með sendinguna á Ara Sigurpálsson, sem tók snúning áður en hann setti boltann í netið.
Í síðari hálfleiknum voru Víkingar með algera yfirburði.
Helgi Guðjónsson kom inn af bekknum og skoraði fjórða mark Víkinga. Ari kom með laglega sendingu inn í teiginn á Helga sem skoraði örugglega.
Þremur mínútum fyrir lok venjulegs leiktíma batt Gunnar Vatnhamar endahnútinn. Davíð Örn Atlason fékk boltann hinum megin við vítateiginn eftir hornspyrnu Viktors Örlygs. Hann kom honum á Gunnar sem gerði fimmta markið.
Öruggur og sanngjarn sigur Víkinga sem eru með 33 stig á toppnum en HK áfram í 10. sæti með 14 stig.
Úrslit og markaskorarar:
Fram 4 - 1 Valur
1-0 Már Ægisson ('10 )
2-0 Frederico Bello Saraiva ('26 , víti)
3-0 Kennie Knak Chopart ('32 )
3-1 Patrick Pedersen ('39 )
4-1 Frederico Bello Saraiva ('72 )
Lestu um leikinn
Víkingur R. 5 - 1 HK
1-0 Nikolaj Andreas Hansen ('14 )
1-1 George Johannes Nunn ('19 )
2-1 Nikolaj Andreas Hansen ('39 )
3-1 Ari Sigurpálsson ('44 )
4-1 Helgi Guðjónsson ('77 )
5-1 Gunnar Vatnhamar ('87 )
Lestu um leikinn
Besta-deild karla
Lið | L | U | J | T | Mörk | mun | Stig |
---|---|---|---|---|---|---|---|
1. Breiðablik | 21 | 14 | 4 | 3 | 48 - 25 | +23 | 46 |
2. Víkingur R. | 20 | 13 | 4 | 3 | 47 - 23 | +24 | 43 |
3. Valur | 21 | 10 | 5 | 6 | 49 - 32 | +17 | 35 |
4. FH | 21 | 9 | 5 | 7 | 36 - 35 | +1 | 32 |
5. ÍA | 21 | 9 | 4 | 8 | 40 - 31 | +9 | 31 |
6. Stjarnan | 21 | 9 | 4 | 8 | 39 - 35 | +4 | 31 |
7. KA | 21 | 7 | 6 | 8 | 32 - 37 | -5 | 27 |
8. Fram | 21 | 7 | 5 | 9 | 28 - 29 | -1 | 26 |
9. KR | 20 | 5 | 6 | 9 | 34 - 39 | -5 | 21 |
10. HK | 21 | 6 | 2 | 13 | 23 - 51 | -28 | 20 |
11. Vestri | 21 | 4 | 6 | 11 | 22 - 42 | -20 | 18 |
12. Fylkir | 21 | 4 | 5 | 12 | 26 - 45 | -19 | 17 |
Athugasemdir