Heimir Guðjónsson, þjálfari FH, var nokkuð sáttur með 2-0 iðnaðarsigur liðsins á Vestra á Kerecis-vellinum á Ísafirði í dag.
Lestu um leikinn: Vestri 0 - 2 FH
FH-ingar voru ekkert sérstaklega sannfærandi í fyrri hálfleiknum, en frammistaða liðsins batnaði í þeim síðari og náði liðið að setja tvö mörk á lokakafla leiksins.
„Við vorum ekki góðir í fyrri hálfleik, hvorki varnarlega né sóknarlega og þeir voru betri á öllum sviðum fótboltans. Þrátt fyrir það sköpuðu þeir sér engin opin færi í fyrri hálfleiknum. Í seinni hálfleik vorum við góðir varnarlega, stóran hluta, en betri sóknarlega og náðum að opna þá betur. Það voru svo miklir möguleikar fyrir okkur í skyndisóknum í fyrri hálfleik en nýttum það ekki nógu vel en nýttum það betur í seinni hálfleik. Við héldum markinu hreinu, skoruðum tvö og förum sáttir héðan,“ sagði Heimir við Fótbolta.net.
FH-ingar fengu urmul af hornspyrnum og voru búnir að greina Vestra liðið vel. Það var aðeins tímapursmál hvenær boltinn myndi detta í netið eftir eina slíka en Ólafur Guðmundsson gerði það á 82. mínútu.
„Auðvitað vitum við það og höfum horft á Vestra í föstum leikatriðum og við töldum að þetta væri besta leiðin til að særa þá. Óli Guðmunds gerði mjög vel og kláraði frábærlega. Mér fannst þessi föstu leikatriði vera þannig að við vorum að komast nær, nær og nær þannig gott að skora úr föstu leikatriði.“
Einnig var lagt upp með að nýta löngu innköstin en það var hins vegar ekki alveg að ganga upp í dag.
„Það er vægt til orða tekið hjá þér. Þau voru ömurleg. Ég held að við þurfum að eyða einhverjum part af næstu viku og láta Jóa og Sigga æfa löngu innköstin því við erum með marga góða skallamenn og sem eru sterkir í loftinu þannig við þurfum að nýta þetta betur.“
Hvernig lítur framhaldið út?
„Það sem ég hef alltaf sagt er að einbeita okkur að einum leik í einu. Klúbburinn er þannig saman settur að við viljum alltaf vera að keppa um eitthvað. Ég hef sagt það við leikmannahópinn að líta frekar upp á við en niður á við. Þetta var einn liður af því og nú er það að koma okkur niður á jörðina og einbeita okkur að næsta leik,“ sagði Heimir ennfremur, en hann talaði einnig um meiðsli Grétars Snæ Gunnarssonar í viðtalinu hér fyrir ofan.
Besta-deild karla
Lið | L | U | J | T | Mörk | mun | Stig |
---|---|---|---|---|---|---|---|
1. Breiðablik | 21 | 14 | 4 | 3 | 48 - 25 | +23 | 46 |
2. Víkingur R. | 20 | 13 | 4 | 3 | 47 - 23 | +24 | 43 |
3. Valur | 21 | 10 | 5 | 6 | 49 - 32 | +17 | 35 |
4. FH | 21 | 9 | 5 | 7 | 36 - 35 | +1 | 32 |
5. ÍA | 21 | 9 | 4 | 8 | 40 - 31 | +9 | 31 |
6. Stjarnan | 21 | 9 | 4 | 8 | 39 - 35 | +4 | 31 |
7. KA | 21 | 7 | 6 | 8 | 32 - 37 | -5 | 27 |
8. Fram | 21 | 7 | 5 | 9 | 28 - 29 | -1 | 26 |
9. KR | 20 | 5 | 6 | 9 | 34 - 39 | -5 | 21 |
10. HK | 21 | 6 | 2 | 13 | 23 - 51 | -28 | 20 |
11. Vestri | 21 | 4 | 6 | 11 | 22 - 42 | -20 | 18 |
12. Fylkir | 21 | 4 | 5 | 12 | 26 - 45 | -19 | 17 |
Athugasemdir