Kristófer í leik gegn Þrótti í 1. deildinni.
Kristófer Eggertsson skoraði tvö mörk fyrir Víking Ólafsvík sem tapaði 3-5 fyrir Þýskalandsmeisturunum í Hamborg Panthers í lokaleik Futsal-riðilsins sem haldinn var í Ólafsvík. Ólsarar luku riðlinum með þrjú stig en þeirra besta frammistaða var gegn þýska liðinu sem vann riðilinn með fullt hús.
Kristófer hafði afar takmarkaða reynslu af Futsal fyrir mótið en hann var afar öflugur og fyrra mark hans í kvöld var líklega mark mótsins, þrumuskot af löngu færi sem fór upp í samskeytin.
„Það er frábært að taka þátt í Futsal og við höfðum allir geðveikt gaman að þessu. Ég tók þátt í Futsal þegar ég var í þriðja flokki en æfði ekki einu sinni fyrir þetta mót. Ég átti erfitt uppdráttar í fyrsta leiknum en annars var þetta mjög gaman," sagði Kristófer eftir leikinn í kvöld.
„Þó þeir séu atvinnumenn og æfa þetta allan ársins hring vorum við ekkert verri en þeir. Þeir töluðu um það eftir leik að við værum besta liðið sem þeir spiluðu á móti."
Kristófer gekk í raðir Ólafsvíkinga frá KV fyrir tímabilið og er hæstánægður með þá ákvörðun. Viðtalið má sjá í heild sinni í sjónvarpinu hér að ofan.
Athugasemdir
