banner
   lau 28. nóvember 2015 19:20
Ívan Guðjón Baldursson
England: Toppliðin gerðu leiðinlegt jafntefli
Mynd: Getty Images
Leicester City 1 - 1 Manchester United
1-0 Jamie Vardy ('24)
1-1 Bastian Schweinsteiger ('45)

Toppslag Leicester City og Manchester United var að ljúka rétt í þessu með tíðindalitlu jafntefli.

Jamie Vardy bætti markametið í ensku deildinni þegar hann kom Leicester yfir um miðjan fyrri hálfleik og skoraði þar með í sínum ellefta deildarleik í röð.

Rauðu djöflarnir héldu boltanum vel innan liðsins en sköpuðu sér mjög lítið af færum, þrátt fyrir það tókst þeim að jafna rétt fyrir leikhlé þegar Bastian Schweinsteiger skallaði knöttinn í netið af stuttu færi.

Síðari hálfleikurinn var enn leiðinlegri en sá fyrri þangað til í lokin þegar gestirnir frá Manchester pressuðu stíft og sköpuðu sér nokkur færi, án þess að koma knettinum þó í netið.

Leiknum lauk með jafntefli og er Leicester með 29 stig eftir jafnteflið, við hlið Manchester City á toppnum, á meðan Man Utd er með 28 stig í þriðja sæti og þar á eftir kemur Arsenal með 26 og leik til góða, gegn Norwich á morgun.
Athugasemdir
banner
banner
banner