„Mig minnir að við höfum keypt hann 1999. Frábær kaup, skömmu eftir kaupin á Patrick Vieira. Þeir gerðu gæfumuninn," sagði Wenger.

„Henry var gáfaður, hæfileikaríkur, áhugasamur og einbeittur. Hann elskar fótbolta og er ennþá að starfa innan geirans, fyrir ykkur!

„Ég get ekki sagt að hann hafi verið besti leikmaðurinn minn hjá Arsenal. Það er ekki hægt að bera sóknarmann saman við varnarmann. Þetta er eins og að velja á milli afkvæma sinna."

Henry fór frá Arsenal 30 ára gamall, eftir 8 ár hjá félaginu. Hann fór til Barcelona fyrir 24 milljónir evra.

„Hann sagðist vilja fara. Hann sagði að leikmannahópurinn væri alltof ungur til að vinna deildina og að hann væri á síðustu árum ferilsins, hann þyrfti að fara til að vinna titla. Þá leyfði ég honum að fara."

Henry vann allt mögulegt á þremur árum hjá Börsungum og lauk ferlinum með New York Red Bulls, í MLS deildinni.

Wenger rifjaði upp þegar Arsenal tapaði fyrir Barcelona í úrslitaleik Meistaradeildarinnar 2006.

„Þetta var ótrúlega sárt tap því við misstum Jens Lehmann af velli strax í byrjun. Við spiluðum gegn Barcelona og vorum ekki búnir að fá mark á okkur alla útsláttarkeppnina, þar til 13 mínútur voru eftir.

„Samuel Eto'o og Juliano Belletti skoruðu á lokakaflanum. Það var mjög sárt að spila leikinn manni færri."