Sunderland er fallið úr ensku úrvalsdeildinni. Þetta varð ljóst eftir þá leiki sem voru að klárast nú fyrir stuttu. Sunderland fékk Bournemouth í heimsókn og enn eitt tapið var niðurstaðan.

Tímabilið hefur alls ekki farið með David Moyes og hans mönnum í Sunderland. Þeir komust aldrei í gang og það var frekar snemma ljóst að þeir voru á leiðinni niður í Championship-deildina.

Í dag var niðurstaðan 1-0 tap, en sigurmarkið gerði Joshua King, sem hefur verið sjóðandi heitur upp á síðkastið, á 88. mínútu. Svekkjandi úrslit fyrir Sunderland, en jafntefli hefði ekki breytt miklu.

Jamie Vardy tryggði Leicester 1-0 sigur og Englandsmeistararanir eru ekki að fara niður, það er eiginlega alveg ljóst.

Það voru svo tvö markalaus jafntefli. Southampton fékk tækifæri til að vinna Hull, en Dusan Tadic klúðraði vítaspyrnu undir lokin. Stoke og West Ham gerðu einnig markalaust jafntefli.