Bayern München tryggði sér Þýskameistaratitilinn eftir 6-0 útisigur á Wolfsburg í kvöld.

David Alaba skoraði fyrsta mark leiksins á 19. mínútu, Robert Lewandowski skoraði tvö mörk fyrir lok fyrri hálfleiks og staðan því 0-3 fyrir gestunum í Bayern í hálfleik.

Staðan var orðinn 0-4 eftir 66 mínútur þegar Arjen Robben setti boltann í mark heimamanna.

Thomas Muller skoraði fimmta mark gestanna á 80. mínútu og Joshua Kimmich gulltryggði svo öruggan 0-6 sigur Bayern á 85. mínútu.

RB Leipzig situr í öðru sæti þýsku úrvalsdeildarinnar tíu stigum á eftir Bayern þegar þrjár umferðir eru eftir og á því ekki lengur möguleika á að ná Bayern.

Þetta er fimmta skiptið í röð sem Bayern verður þýskur meistari.