Stjarnan hefur styrkt sig vel í glugganum.
Kvennalið Stjörnunnar hefur fengið til liðs við sig brasilíska landsliðskonu sem spilaði á HM í Kanada í sumar. Hún heitir Poliana Barbosa Medeiros og er 24 ára gömul. Hún var nú síðast með brasilíska landsliðinu sem vann Pan-American leikana síðastliðinn laugardag.
Líkt og hin brasilíska landsliðskonan í Stjörnunni, Francielle Manolo Alberto, hefur Poliana leikið með Sao Jose í heimalandinu og vann hún Meistaradeild Suður-Ameríku í þrígang með liðinu.
Poliana er varnarmaður sem á 34 landsleiki að baki fyrir Brasilíu og hefur skorað í þeim tvö mörk.
Hún er fjórði leikmaðurinn sem Stjarnan fær í sumarglugganum, en liðið heldur til Kýpur í næsta mánuði þar sem það tekur þátt í forkeppni Meistaradeildarinnar. Mun Stjarnan alls spila átta leiki á innan við fjórum vikum frá ágúst og fram í byrjun september.
Athugasemdir
