Það er nóg að gerast í Lengjubikarnum í dag. Það er leikið í A- og C-deild karla og þá verður einnig spilað í B-deild kvenna.

Fyrstu leikirnir hefjast kl. 18:00, en um tvo leiki í Riðli 3 í A-deild er að ræða. Valur mætir ÍA í Pepsi-deildarslag og HK og Víkingur Ó. eigast við í Kórnum í Kópavogi. Liðin fjögur eru að leika sína síðustu leiki í riðlinum, en það er ljóst að Valur og ÍA eru komin áfram.

Klukkutíma eftir að þeir leikir hefjast fara þrír aðrir leikir í A-deild af stað. Víkingur R. heimsækir Hauka í Hafnarfjörðinn, Grótta og FH eigast við og Stjarnan og Grindavík mætast í öðrum Pepsi-deildarslag. FH er komið áfram, en Grindavík og Stjarnan eru bæði að berjast um að komast upp úr sínum riðli.

Léttir og Skallagrímur mætast í C-deild karla og Fylkir og Keflavík eigast við í B-deild kvenna. Þessir tveir síðastnefndu leikir hefjast á slaginu 20:00, en hér að neðan má sjá alla leiki, leikstaði og tíma.