Leik Atletico Madrid og Rayo Vallecano í La Liga á Spáni var að ljúka, en Atletico gat með sigri skotist á topp deildarinnar.

Fyrri hálfleikurinn var markalaus, en þegar tíu mínútur voru búnar af þeim seinni skoraði Antoine Griezmann.

Griezmann hafði komið inn á sem varamaður stuttu fyrir markið, en þetta var hans 21. mark í deildinni.

Markið reyndist sigurmark leiksins, en Atletico fer því á toppinn í bili. Barcelona getur endurheimt toppsætið með sigri á Real Betis á eftir.

Atletico Madrid er með 85 stig á toppnum eða þremur stigum meira en Barcelona, en Rayo Vallecano er með 35 stig í 17. sæti.