Leicester hefur sjö stiga forskot á toppi deildarinnar þegar þrem umferðum er ólokið og getur liðið því tryggt sér titilinn með því að vinna Man Utd á morgun.

Hollendingurinn bendir á að Man Utd hafi enn að miklu að keppa og liðið þurfi sigur á morgun.

„Við verðum að vinna Leicester. Við erum enn að berjast um að komast ofar í töflunni. Við getum ekki leyft þeim að fagna titlinum á Old Trafford um helgina. Þeir geta gert það um næstu helgi. Við erum því ekki að skemma partýið, við ætlum bara að fresta því aðeins," segir van Gaal.

Gengi Leicester hefur komið flestum þeim sem fylgjast með fótbolta á óvart en van Gaal segir ekkert óvænt við velgengni þeirra.

„Ég var fyrstur til að segja að þeir gætu orðið meistarar. Þetta kemur mér ekki á óvart. Ég hef sagt það margoft að ég trúi að hægt sé að byggja upp meistaralið og það er það sem þjálfarinn þeirra hefur gert."

„Þeir hafa alltaf getað stillt upp sama liði því þeir eru ekki að spila jafnmarga leiki og liðin sem eru að keppa við þá. Það er gott fyrir ensku úrvalsdeildina og fyrir fótboltann að það sé ekki alltaf sama liðið sem vinnur deildina," segir van Gaal.