Patric Evra, landsliðsmaður Frakka, segir að liðið muni ekki vanmeta Íslendinga í leiknum í 8-liða úrslitum EM á sunnudag.

Evra hafði varað Englendinga við Íslendingum fyrir leik liðanna á mánudag. Hann segir enga möguleika á því að Frakkar vanmeti Íslendinga.

„England sýndi Íslandi ekki virðingu en við munum ekki vanmeta þá," sagði Evra á fréttamannafundi í dag.

„Enskir fjölmiðlamenn töldu að enska liðið væri betra en það er. Ísland verðskuldaði sigurinn og ég virði þá. Það verður erfitt að ná sigri."