Arnar Skúli var svekktur með að landa ekki sigri en jafnframt ánægður með fyrsta stig sumarsins
„Þetta eru mikil vonbrigði. Við stjórnuðum leiknum alveg frá upphafi og fengum betri færi en ólukkan virðist elta okkur í sumar. Ég er samt sáttur við að labba með eitt stig af velli í staðinn fyrir að taka engin eins og hefur verið í allt sumar,“ sagði Arnar Skúli Atlason þjálfari Tindastóls. Tindastóll fékk sitt fyrsta stig í deildinni í sumar þegar liðið gerði 1-1 jafntefli við topplið HK/Víkings.
Lestu um leikinn: HK/Víkingur 1 - 1 Tindastóll
Það var ekki að sjá á leiknum í kvöld að liðin væru að berjast á sitthvorum enda deildarinnar og greinilegt að það býr hellingur í liði Tindastóls. Eftir góðan fyrri hálfleik fór þó aðeins að draga af liðinu í þeim síðari.
„Við erum að spila þriðja leikinn okkar á sjö dögum núna og erum búin að gera eina breytingu á milli leikja. Ég held að mitt lið hafi verið orðið pínu þreytt. Það er búið að vera mikið álag,“ sagði Arnar Skúli aðspurður um það hvers vegna lið hans sat svona aftarlega í síðari hálfleik.
Bandarísku leikmennirnir Emily Key og Madison Cannon voru frábærar í fyrri hálfleik, stöðugt ógnandi. Arnar Skúli var ánægður með þær eins og aðra leikmenn sína.
„Þær eru að komast betur inn í þetta núna og inn í okkar system. Miðjumennirnir eru líka að ná að connecta betur við þær. Það er búið að taka aðeins lengri tíma en ég átti von á en ég er mjög ánægður með mitt lið og við höldum bara áfram,“
Tindastóll er áfram á botni deildarinnar en komið með eitt stig. Arnar Skúli telur það raunhæft að bjarga sér frá falli þrátt fyrir stigaleysið.
„Við erum ekki með lélegasta liðið í þessari deild. Það er alveg á hreinu og við ætlum að halda áfram að berjast.“
Nánar er rætt við Arnar Skúla í sjónvarpinu hér að ofan.
Athugasemdir
