FH og Stjarnan mætast í hreinum úrslitaleik um titilinn í lokaumferð Pepsi-deildarinnar á laugardag en það er í fyrsta skipti sem þessi staða kemur upp síðan ÍBV og ÍA mættust í lokaumferðinni í Eyjum árið 2001.

,,Þessi titill var mjög óvæntur og ekki bara í sögu ÍA heldur í sögu Íslandsmótsins. KR hafði haft mikla yfirburði tvö árin á undan og þetta var mjög sætt," segir Hjörtur þegar hann rifjar upp leikinn.

,,Við duttum út í undanúrslitum í bikarnum nokkrum dögum áður og það var nóg að gera fram að þessum leik. Við höfðum ekki mikinn tíma til að velta okkur upp úr þessum leik."

Gistu á hermannabeddum
Aðrir leikir í lokaumferðinni fóru fram laugardaginn 22. september en þann dag ferðuðust Skagamenn til Eyja fyrir leikinn daginn eftir.

,,Það var vitlaust veður og við fórum með Herjólfi frá Þorlákshöfn á laugardeginum. Það var sjóriða og menn voru hálf tuskulegir á laugardagskvöldinu. Þar sem klúbburinn var hálf gjaldþrota var okkur hent í eitthvað gistihús hjá Siggu í skuld eða eitthvað álíka. Þar voru fangabeddar fyrir menn og menn voru misvel hvíldir á sunnudagsmorgninum. Annars var þetta allt frábært."

Leikurinn hófst klukkan 14:00 en þá var mikill vindur á Hásteinsvelli. ,,Við byrjuðum vel og komumst í 2-0 þegar Kári Steinn (Reynisson) og Siggi Sigursteins skoruðu. Við spiluðum undan mjög sterkum vindi í fyrri hálfleik og þetta leit afskaplega vel út. Tómas Ingi Tómasson minnkaði muninn með frábæru marki í fyrri hálflek og síðan bætti í vindinn."

,,Við vorum í vörn allan síðari hálfleikinn. Tommi jafnaði með öðru marki og eftir það var þetta algjör nauðvörn. Þeir lágu á okkur og í minningunni fengu þeir fullt af færum. Eftir að hafa horft aftur á leikinn þá voru færin ekki það mörg. Þetta var samt mjög langur seinni hálfleikur og sérstaklega þar sem Egill Már (Markússon) dómari dæmdi af óskiljanlegum ástæðum við fimm mínútum og síðan mínútu við þann tíma."

Umdeilt atvik átti sér stað þegar korter var eftir en Tómas Ingi Tómasson skoraði þá þriðja mark sitt í leiknum eftir að Sturlaugur Haraldsson sparkaði boltanum til baka úr aukaspyrnu. Egill Már lét hins vegar endurtaka aukaspyrnuna.

,,Sturri tók aukaspyrnu sem Eyjamenn töldu að hefði verið tekin löglega en það mark fékk ekki að standa. Það var mikil dramatík og þessi leikur hafði upp á allt að bjóða."

Margir Skagamenn misstu af leiknum
Skagamönnum var ekki spáð góðu gengi fyrir sumarið 2001 enda hafði verið gífurlega mikið skorið niður í rekstri félagsins. Menn á Akranesi fögnuðu titlinum vel og innilega.

,,Það var svo vitlaust veður að það voru engar ferðir til Eyja á sunnudeginum. Margir svekktir Skagamenn komust ekki lengra en til Þorlákshafnar. Eyjamenn voru svo indælir að láta okkur fá kampavín og drykkjarföng eftir leik þar sem að þeir þurftu ekki að nota það."

,,Við fórum síðan strax með Herjólfi í Þorlákshöfn þar sem 500 manns frá Akranesi biðu. Þar var fagnað með þeim og síðan var farið upp á Skaga þar sem við vorum mættir fimm tímum eftir leik. Í minningunni var eins og allur skaginn hafi verið mættur á Akratorg að fagna með okkur. Það var ógleymanleg stund."

Hallast að sigri FH
Hjörtur býst við hörkuleik í Hafnarfirði á laugardag en hann hefur trú á að FH-ingar verði Íslandsmeistarar.

,,Ég var aldrei búinn að afskrifa Stjörnuna en þeir hafa komið skemmtilega á óvart með því að kreista út úrslit og skora sigurmark á síðustu mínútunum. Þeir hafa farið þetta á miklum karakter og það er alltaf góðs viti þegar það er þannig stemning í liðinu."

,,FH-ingar eru með frábæran mannskap og frábæran þjálfara sem er með mikla reynslu. Þeir kunna allir að vinna og hafa allir unnið áður. Sigurhefðin skiptir rosalegu miklu máli í svona leikjum og ég held að það og heimavöllurinn ráði úrslitum, ég hallast að því að FH-ingarnir taki þetta," sagði Hjörtur.