„Fram að rauða spjaldinu hjá okkur var leikurinn að spilast eins og við vildum að hann myndi spilast," sagði Guðjón Bjarni Hálfdánarson, þjálfari Selfyssinga, eftir markalaust jafntefli gegn Fylki í Pepsi-deildinni í kvöld.
Lestu um leikinn: Fylkir 0 - 0 Selfoss
Sharla Passariello fékk rauða spjaldið snemma í síðari hálfleik fyrir að sparka í Ruth Þórðar. Það reyndist dýrkeypt fyrir Selfoss.
„Rauða spjaldið á rétt á sér. Hún sparkar í hana. Það verður að taka það fram að Ruth og Eva (Núra Abrahamsdóttir) voru búnar að vera með olnbogaskot, fylgja fast á eftir og bomba í okkar leikmenn. Ég er ekki að réttlæta hegðunina hjá mínum leikmanni en dómararnir eiga að grípa inn í þetta fyrr. Þeir hleypa leiknum upp og gera það að verkum að þetta gerist."
Selfoss skoraði 18 mörk í sumar en Guðjón var ósáttur með sóknarleikinn á tímabilinu. „Við höfum ekki verið að klára færin í sumar og það er valdur af þessu í dag."
„Það sem er mest svekkjandi við þetta tímabil er að hópurinn er lítill og erlendu leikmennirnir eru að bregðast okkur, sérstaklega hér í dag. Við gripum of seint inn í það. Ef við horfum á seinni umferðina þá er ekki að koma mikið framlag frá þeim."
Selfoss lék síðast í 1. deildinni árið 2011 en Guðjón segir að liðið muni ekk stoppa lengi þar núna. „Við horfum björtum augum á framhaldið. Selfoss er flottur klúbbur og það er gott starf unnið þar. Kjarninn í liðinu hefur mikinn eldmóð fyrir félaginu. Við horfum í það að þetta lið verði fljótt að rífa sig upp úr þessu mótlæti og gera það vel. Þið sjáið Selfoss fljótlega aftur í Pepsi-deildinni."
Hér að ofan má sjá viðtalið í heild sinni.
Athugasemdir