Chelsea fékk Man City í heimsókn í uppgjöri bestu liða enska boltans. Það voru nokkrir lykilmenn fjarverandi og ber þá helst að nefna þá Yaya Toure, Diego Costa og Cesc Fabregas.

Loic Remy fékk tækifærið í kjölfar fjarveru Diego Costa og það var Remy sem kom heimamönnum í 1-0 eftir sendingu Eden Hazard. Mark Remy kom á 41.mínútu en gestirnir frá Manchester náðu að jafna metin fyrir hlé. Þar var að verki David Silva sem var réttur maður á réttum stað og stýrði skoti Sergio Aguero í netið.

Frank Lampard sneri aftur á Stamford Bridge í dag. Hann byrjaði á bekknum hjá Man City en kom inná seint í síðari hálfleik. Gestirnir reyndu hvað þeir gátu að ná sigurmarkinu á meðan heimamenn virtust sætta sig við jafnteflið, enda með gott forskot á toppi deildarinnar.

James Milner komst næst því að skora en skot hans fór framhjá markinu og jafntefli niðurstaðan í þessum risaleik.