Breiðablik tryggði sér sigur í Riðli 4 í A-deild Lengjubikars karla með býsna öruggum sigri á Leikni Fáskrúðsfirði í Fífunni í kvöld.

Fyrsta markið kom eftir hálftíma og það gerði Hrvoje Tokic fyrir Blika. Hinn danski Martin Lund Pedersen bætti svo við öðru marki áður en dómarinn flautaði til hálfleiks.

Blikar voru með öll völd á vellinum og þeir gengu á lagið í seinni hálfleiknum. Hrvoje Tokic setti sitt annað mark á 54. mínútu og í kjölfarið fylgdu þrjú mörk til viðbótar. Þau skoruðu Aron Bjarnason, Sólon Breki Leifsson og Davíð Kristján Ólafsson.

Breiðablik vinnur eins og áður segir Riðil 4 og þeir mæta því Íslandsmeisturum FH í 8-liða úrslitum. Leiknismenn eru úr leik.

Byrjunarlið Breiðabliks: Gunnleifur Gunnleifsson (m), Oliver Sigurjónsson, Damir Muminovic, Höskuldur Gunnlaugsson, Arnþór Ari Atlason, Hrvoje Tokic, Martin Lund Pedersen, Davíð Kristján Ólafsson, Viktor Örn Margeirsson, Andri Rafn Yeoman, Guðmundur Friðriksson.

Byrjunarlið Leiknis F.: Robert Winogrodzki (m), Guðmundur Arnar Hjálmarsson, Almar Daði Jónsson, Javier Angel Del Cueto Chocano, Jesus Guerrero Suarez, Arkadiusz Jan Grzelak, Björgvin Stefán Pétursson, Carlos Carrasco Rodriguez, Kristinn Justiniano Snjólfsson, Hilmar Freyr Bjartþórsson, Unnar Ari Hansson.