Carvajal fór af meiddur af velli í úrslitaleik Meistaradeildarinnar á laugardaginn þegar Real Madrid hafði betur gegn Atlético Madrid eftir vítaspyrnukeppni.

Hann fór í skoðun í Madríd í gær og eftir þær skoðanir kom það í ljós að leikmaðurinn er meiddur aftan í læri og verður eitthvað frá.

Hector Bellerin, bakvörður Arsenal, mun taka stöðu Carvajal í hópnum, en Vicente del Bosque, landsliðsþjálfari Spánar, var búinn að greina frá því. Hann þarf að tilkynna spænska hópinn í síðasta lagi í dag.

„Það fer allt eftir því hvað læknaliðið segir um stöðuna á Carvajal. Bellerin mun vera með hópnum þangað til við vitum um alvarleikann á meiðslum Carvajal," sagði del Bosque eftir 3-1 sigur á Bosníu og Herzegóvínu á föstudaginn.

„Ég íhugaði líka Mario Gaspar, leikmann Villareal, en við verðum að taka það til greina að þessi æfingarhópur var ætlaður til undirbúnings fyrir Evrópumótið. Þess vegna verður Bellerin áfram með hópnum."