Vonir KR-inga um að verja Íslandsmeistaratitil sinn eru nánast úr sögunni eftir að liðið tapaði 3-2 fyrir Stjörnunni í kvöld. KR er níu stigum á eftir FH og aðeins stærðfræðin heldur vonarneista í vesturbæingum. Rúnar Kristinsson, þjálfari KR, hafði þetta að segja eftir leik:
„Það er möguleiki en þetta er orðið langsótt og erfitt. Við hleyptum Stjörnunni og FH of langt frá okkur núna. Við byrjuðum vel en Stjarnan er með gott lið og þeir komu sterkir til baka og gerðu okkur mjög erfitt fyrir," sagði Rúnar.
Stjarnan skoraði sigurmarkið eftir að Aron Bjarki Jósepsson gerði slæm mistök.
„Mér fannst á síðustu 20 mínútunum bara eitt lið vera að reyna að vinna leikinn. Svo gerði Aron greyið stór mistök og þeir refsuðu okkur grimmilega."
Þær fréttir bárust rétt fyrir leikinn að Kjartan Henry Finnbogason væri á leið í dönsku B-deildina.
„Það er mjög líklegt að það gerist á morgun að hann fari til Danmerkur. Á meðan ekki er búið að ganga frá neinu þá ætla ég ekki að tjá mig meira um það."
Kjartan Henry vildi ekki fara í viðtöl eftir leikinn.
Viðtalið við Rúnar má sjá í heild sinni í sjónvarpinu hér að ofan.
Athugasemdir