Allar líkur eru á að Katrín Ómarsdóttir leiki með sænska félaginu Kristianstad á næstu leiktíð en þetta staðfesti Elísabet Gunnarsdóttir þjálfari liðsins við Fótbolta.net í kvöld.
Katrín sem hefur leikið með KR undanfarin ár er búin að samþykkja samning við sænska félagið sem hefur komist að samkomulagi við KR um vistaskiptin.
,,Það á bara eftir að fá félagaskiptin samþykkt hjá sænska knattspyrnusambandinu svo hún ætti að vera orðin leikmaður Kristianstad 1. apríl," sagði Elísabet við Fótbolta.net í kvöld.
Kristianstad hefur leik í sænsku kvennadeildinni 5. apríl næstkomandi og auk Katrínar er Elísabet að vinna í að fá annan leikmann.
,,Við erum að fá bandarískan varnarmann sem hefur æft með Chicaco í atvinnumannadeildinni. Það stendur alveg eins og með Katrínu og er 90% klárt," sagði Elísabet ennfremur.
Fyrir hjá Kristianstad eru þrjár íslenskar stúlkur. Margrét Lára Viðarsdóttir, Erla Steina Arnardóttir og Guðný Björk Óðinsdóttir. Hólmfríður Magnúsdóttir lék með liðinu í fyrra en leikur í Bandaríkjunum á næstu leiktíð.
