Það var slagur um Laugardalinn í Lengjubikarnum í kvöld þegar Inkasso-deildarliðin Fram og Þróttur Reykjavík mættust í Egilshöll.

Þróttarar byrjuðu af krafti og skoraði Brynjar Jónasson strax á 5. mínútu. Finnur Ólafsson, leikmaður Þróttar fékk svo að líta á rauða spjaldið á 35. mínútu og þeir hvítrauðu því einum færri.

Það skipti þó ekki máli því Vilhjálmur Pálmason tvöfaldaði forystu Þróttara á 42. mínútu. Framarar minnkuðu svo muninn á síðustu mínútu fyrri hálfleiks.

Fram jafnaði leikinn á 72. mínútu en skömmu síðar skoraði Sveinbjörn Jónasson sigurmark Þróttara og sjaldgæfur sigurleikur á undirbúningstímabilinu staðreynd hjá rauðum og hvítum.

Sveinbjörn var svo sannarlega óvænt hetja Þróttar en hann lék síðast með liðinu 2013 og skoraði þá 8 mörk í 1. deildinni. Árið 2011 skoraði hann 19 mörk í 22 leikjum með Þrótti í 1. deildinni og lék svo með Fram í Pepsi-deildinni árið á eftir.

Í fyrra spilaði hann nokkra leiki með KH í 4. deildinni en Þróttur hafði ekkert tilkynnt um endurkomu hans til félagsins.