„Ég vil ekki meina að þetta hafi gerst hratt, ég er búinn að taka tíma í að hugsa minn gang og skoða ýmis mál en á endanum ákvað ég að koma aftur til KR," sagði Rúnar Kristinsson nýráðinn þjálfari eftir fréttamannafund þar sem hann var kynntur til leiks í dag.
Rúnar tekur við liðinu af Willum Þór Þórssyni sem yfirgaf félagið á dögunum þar sem hann ætlar að bjóða sig fram til alþingis.
Rúnar tekur við liðinu af Willum Þór Þórssyni sem yfirgaf félagið á dögunum þar sem hann ætlar að bjóða sig fram til alþingis.
Rúnar tók við þjálfun KR sumarið 2010 en liðið varð tvívegis Íslandsmeistari og þrívegis bikarmeistari undir hans stjórn. Hann hætti þá með liðið eftir tímabilið 2014.
„Ég þekki mig vel hér og hef átt góða tíma í KR. Vitandi að það vantatði þjálfara hér þá var erfitt að segja nei þar sem KR er mitt uppeldisfélag, hér eru mínar rætur," sagði Rúnar.
Rúnar hafði aðra möguleika en KR.
„Það voru aðrir möguleikar já, nokkrir. En það hefði verið mjög erfitt að segja nei við KR í ljósi sögunnar. Það voru önnur félög hér heima sem settu sig í samband við mig, en KR er í mínu hjarta."
Sumarið var mikil vonbrigði fyrir KR sem missti af Evrópusæti. Hvernig líst Rúnari á stöðuna hjá liðinu?
„Ég hef fylgst með nokkrum leikjum í sumar og veit hvaða leikmenn eru hér til staðar og það er nægilegur fjöldi af góðum fótboltamönnum hérna. Það er hægt að ná árangri með KR. Það hefur verið erfitt ár hjá félaginu og við þurfum að snúa því við hratt, en við þurfum líka að vera þolinmóðir og gefa okkur tíma," sagði Rúnar.
„Kröfurnar hjá KR eru alltaf þær að vera í efstu sætunum, reyna að komast í Evrópukeppni og jafnvel að vinna titla."
Viðtalið má sjá í heild sinni hér að ofan.
Athugasemdir