Danska félagið Horsens hefur náð samkomulagi við Val um kaup á varnarmanninnum Orra Sigurði Ómarssyni. Þetta staðfestir Bo Henriksen, þjálfari Horsens, í samtali við Horsens Folkeblad.
Orri skoðar aðstæður hjá Horsens í vikunni og spilar meðal annars æfingaleik gegn þýska félaginu Union Berlin á fimmtudaginn.
„Hann er ekki að koma á reynslu. Við höfum fylgst með honum lengi. Hann kemur hingað til að báðir aðilar geti séð hvorn annan og séð hvort þetta sé rétta skrefið," sagði Bo Henriksen en hann lék á sínum tíma með Val, ÍBV og Fram á Íslandi.
Miðvörðurinn Bubacarr Sanneh er á leið til FC Midtjylland um áramótin og hinn 22 ára gamli Orri á að fylla skarð hans.
Orri er uppalinn hjá HK en hann var á mála hjá danska félaginu AGF í þrjú ár áður en hann gekk í raðir Vals fyrir sumarið 2015.
Horsens er í sjötta sæti í dönsku úrvalsdeildinni eftir fimmtán umferðir en framherjinn Kjartan Henry Finnbogason spilar með liðinu.
Athugasemdir