Bæði lið voru að sækja til sigurs í dag. Eftir að Stjarnan komst yfir undir lok leiks þá gleymdu þeir sér í uppbótartíma sem Grindvíkingar nýttu sér.

Jöfnunarmark Stjörnunnar kom eftir aukaspyrnu Hilmars Árna. Eftir að hafa séð markið í sjónvarpinu er ljóst að markið er skráð sjálfsmark á Jajalo markvörð Grindavíkur sem fékk boltann í bakið á sér og inn. Dýrt fyrir Hilmar Árna sem er í kappi við tímann við það að bæta markametið í efstu deild.

Töpuð stig fyrir bæði lið í þeirri baráttu sem þau eru í. Grindavík er nú þremur stigum á eftir KR í baráttunni um síðasta lausa Evrópusætið og Stjarnan tveimur stigum á eftir Breiðablik sem er á toppi deildarinnar.

René Joensen gerði dýrkeypt mistök í aðdraganda marks númer tvö hjá Stjörnunni. Grindavík var í góðri stöðu eftir skyndisókn en hann tók sér alltof langan tíma með boltann og gaf lélega sendingu sem varð þess valdandi að Stjarnan keyrði upp í sókn og skoraði.

Jóhann Ingi fór af velli um miðjan seinni hálfleik. Hann átti erfiðan dag í dag en Pétur Guðmundsson kom inn og hafði betri stjórn á leiknum.