Frammistaða Bukovec í marki Þórs/KA og sömuleiðis hörmuleg færanýting Wolfsburg. Það sem rataði á markið varði Bukovec, magar tilraunir fóru framhjá og rest náði þéttur varnarmúr Þórs/KA að koma sér fyrir. Lið eins og Wolfsburg á engu að síður að nýta eitthvað af þeim færum sem það fékk í dag.

Sláarskot Mayorsins. Sandra Mayor var nálægt því að skora mark ársins í Meistaradeildinni þegar hún hamraði boltann í vinkilinn af 25-30 metrunum á lokamínútum leiksins. Það hefði snúið þessu einvígi á hvolf.

Draumur Þórs/KA um að komast í næstu umferð lifir, en það er ljóst að það verður ekkert auðvelt. Þær verða að skora mark þar og helst fá ekki neitt á sig. Það gæti reynst snúið, miðað við leikinn í dag.

Ég ætla að setja sóknarlínu Wolfsburg í þennan dálk. 16-3 í hornspyrnum, aragrúi færa en inn fór boltinn ekki. Þær naga sig í handarbökin alla leiðina heim til Þýskalands.

Þurfti sjaldan að grípa inn í og leikurinn flaut þægilega áfram.