Gullfótur Erlings Agnarssonar réði úrslitum í kvöld skoraði líka þetta glæsilega mark sem sómir sér vel sem sigurmark leiksins. Hnitmiðað og fast skot í blávinkilinn sem Arnar í marki HK átti aldrei möguleika á að verja.

Eftir rosalega vinnusemi og baráttu Guðmundar Andra Tryggvasonar sem vinnur vonlausan bolta,kemst inná teiginn og leggur hann fyrir Atla Hrafn sem er einn fyrir opnu marki nánast á markteig á 42. mínútu tók Atli uppá því að skjóta framhjá, hvernig hef ég ekki hugmynd um og vona eiginlega að hann viti það ekki heldur. Sem betur fer reyndist það ekki dýrt í dag.

Víkingar sækja sinn fyrsta sigur í sumar og fara í 7 stig og skilja Val eina eftir á botninum og lyfta sér upp í 9.sæti. HK situr svo sæti fyrir neðan með 5 stig.

Framlína HK fékk alveg færi en náði bara ekki að nýta þau. Sannkallað stöngin út og menn þurfa að ná sér í sjálfstraust og koma boltanum í netið.

Þokkalegur dagur hjá Agli í dag. Mætti vera samkvæmari sjálfum sér en dæmir of mikið á klafs en sleppir sumum augljósum brotum. Leyfði þó leiknum að fljóta vel að mestu.