KA-menn virkuðu tilbúnari í bardagann. Aðstæður á Greifavellinum voru ekkert til þess að hrópa húrra fyrir og áferðarfallegur fótbolti var ekki líklegur. Heimamenn unnu fleiri tæklingar og fleiri seinni bolta og það taldi stórt í dag. Auk þess var Hallgrímur Mar Steingrímsson í banastuði og lagði upp hvert færið af fætur öðru. Þá hjálpaði það Stjörnunni ekki að Daníel Laxdal skyldi fá rautt spjald á 44. mínútu.

Fyrsta mark leiksins. Daníel Laxdal átti hræðilega sendingu aftur á Harald, sem að Elfar Árni komst inní og Daníel tók Elfar niður inní vítateig. Vítaspyrna dæmd og KA komnir yfir. Haraldur náði reyndar að verja víti Hallgríms, en KA-maðurinn var fyrstur á boltann og skoraði.

KA lyftir sér allavega tímabundið upp fyrir Grindavík og sitja í 10. sæti deildarinnar með 19 stig. KA eiga útileik gegn Eyjamönnum næst, sem að verður að teljast dauðafæri fyrir KA-menn til þess að ná í önnur þrjú stig. Garðbæingar eru í 4. sæti með 24 stig. Stjarnan á heimaleik gegn Skagamönnum sem eru ekki á góðri siglingu um þessar mundir.

Daníel Laxdal verður að fá þessa viðurkenningu í dag. Hann vill sennilega gleyma þessum leik sem fyrst. Hann gefur víti og fær rautt spjald, sem skildi Stjörnuna eftir í vondum málum. Vallaraðstæður hjálpuðu honum þó ekki.

Ekki auðveldur leikur að dæma, en Ívar Orri komst mjög vel frá sínu verkefni.