Stórkostleg frammistaða Þróttar í síðari hálfleik skóp sigurinn. Skagakonur mættu mjög þéttar og flottar til leiks og lokuðu vel á styrkleika toppliðsins í fyrri hálfleik. Yfirburðir Þróttar í þeim síðari voru hinsvegar miklir og þær uppskáru að lokum sanngjarnan 4-0 sigur.

Eftir hörku fyrri hálfleik braut Linda Líf ísinn með fyrsta marki Þróttar rétt fyrir leikhlé. Þróttarar höfðu verið stressaðar fram að því en markið tók ákveðna pressu af þeim og þeim leið miklu betur í kjölfarið.

Einfalt mál. Þróttur leikur í efstu deild næsta sumar. Liðið er á toppi Inkasso-deildarinnar með 39 stig og 52 mörk í plús! Skaginn er áfram í 6. sæti og í harðri fallbaráttu, þremur stigum frá fallsæti.

Eftir flottan fyrri hálfleik tóku við 25 mjög erfiðar mínútur fyrir Skagaliðið þar sem þeim gekk illa að eiga við spræka Þróttara. Slæmt brot úr degi hjá heimakonum. Unnar Þór, annar þjálfari ÍA, var svo óheppinn undir lok leiks þegar honum var sýnt gula spjaldið fyrir mótmæli kollega síns, Arons Ýmis. Það var skondið en leiðinlegt fyrir Unnar að fara í bókina.

Fínt hjá tríóinu í heildina.