Íslenska liðið er margfalt betra en það lettneska og það skein svo augljóslega í gegn í þessum leik. Þrátt fyrir skelfilegar vallaraðstæður þá náði Ísland að láta gæðamuninn sjást mjög augljóslega.

Rakel Hönnudóttir kom af bekknum og lék sinn 100. landsleik. Til hamingju með áfangann Rakel!

Faglega klárað hjá stelpunum okkar sem voru hrikalega vel undirbúnar og vissu mjög vel hvað þær voru að fara út í. Sigurinn hefði getað orðið stærri en við afþökkum ekki 6-0 og Ísland er með fullt hús. Þessi riðill snýst bara um einvígi á toppnum við Svíþjóð.

Þetta lettneska lið er alls ekki gott en ég neita að trúa því að það sé eins hrikalega ömurlegt og það var í kvöld. Það er bara ekki hægt!

Sú hollenska náði að taka ótrúlega margar daprar ákvarðanir í leik sem átti að vera auðdæmdur. En Jón Þór Hauksson getur ekki afsakað það að bjóða upp á að láta reka sig upp í stúku í stöðunni 5-0. Hann á að vera höfuðið í liðinu og getur ekki gert sig sekan um að bjóða upp á svona agaleysi.