Leikmenn Þórs virtust eiga aðeins meira á tankinum en Grindvíkingar, sem náðu sér ekki á strik í síðari hálfleik og virtust sáttir með jafntefli, eftir því sem nær dró að lokaflauti Sigurðar. Þórsarar voru hungraðari í sigurmarkið og uppskáru það örskömmu fyrir leikslok.

Sigurmark Alvaro Montejo. Stuðningsmenn Þórs ærðust af fögnuði og lái þeim hver sem vill. Frábært augnablik til þess að koma fótboltasumrinu af stað í Þorpinu

Þetta var fyrsti kafli af 22 í Lengjudeildinni og Þórsarar eru komnir á blað. Þeir hafa þá nælt í 3 stig en Grindvíkingar eru enn á byrjunarreit og eru með núll.

Guðmundur Magnússon hafði úr litlu að moða og virkaði önugur. Hann komst ekki í mikinn takt við leikinn og Þórsvörnin hafði góð tök á honum.

Sigurbjörn Hreiðarsson var ekki sáttur með Sigurð Hjört í aðdraganda sigurmarks Þórs, undirritaður er ekki dómbær á það enda sá ég ekki atvikið almennilega. En annars hafði hann heilt yfir ágæt tök á leiknum.