Það var mjög mikill gæðamunur á liðunum frá upphafi til enda í dag. Valskonur með alla stjórn á leiknum og komu í veg fyrir að Þór/KA næði að tengja saman margar sendingar fram völlinn, hvað þá skapa sóknir.

Leyfum draumamarki Dóru Maríu að njóta sín hér. Sjötta og fallegasta mark leiksins kom í uppbótartíma. Það var skorað með vel heppnaðri ristarspyrnu ala Dóra María. Algjört bjútí.

Íslandsmeistararnir hafa byrjað mótið af krafti. Eru með fullt hús stiga og 9 mörk í plús eftir fyrstu þrjár umferðirnar. Norðankonur fá hinsvegar skell eftir sterka byrjun á mótinu. Eru áfram með 6 stig.

Þór/KA-liðið átti í miklum vandræðum með hraða sóknarmenn Vals. Hulda Björg fékk það erfiða hlutverk að eiga við Hlín Eiríks. Var í miklu basli og fór útaf í hálfleik. Þá átti Harpa markvörður að gera betur í þremur af mörkum Vals.

Það vantaði uppá samræmið í vítadómum hjá Þórði. Valskonur fengu víti sem myndi alltaf flokkast nokkuð soft. Stuttu síðar átti töluvert harkalegri bakhrinding sér stað í hinum vítateignum en ekkert dæmt. Að öðru leyti ekki margar stórar ákvarðanir að taka.