Sigurmarkið réði úrslitum í kvöld. Svo það sé tekið fram einhvers staðar þá var leiðinlegt að horfa á þennan leik í kvöld. Það vill oft verða þannig þegar Þórsarar lenda undir, allavega á heimavelli, að þeir upplifi allt á móti sér og leikurinn snýst ekki um boltann lengur. Að því sögðu þá gera Þórsarar klárt tilkall til tveggja vítaspyrna í leiknum. Tuðið, leikmenn og stuðningsmenn, var samt ekki bara út í vítadóma heldur fullt af litlum atriðum sem skipta engu máli. Kannski er upplifun Þórsara það sterk að allt sé á móti þeim að þeir ná ekki að spila sinn leik en þeir áttu, miðað við spilamennsku, að hámarki stig skilið í kvöld.

Markið hjá Nacho, rauða spjaldið á Túfa þegar hann fer í Svenna, markið sem er dæmt af [Jakob Snær skoraði] eftir langt samtal AD1 og dómara, rangstöðumarkið eða vítið sem ekki var dæmt undir lokin. Erfitt að velja á milli. Í markinu sem dæmt var af vegna brots þá reynir Jóhann Helgi við boltann og fer í varnarmann Vestra. Boltinn berst á Jakob Snæ sem skorar.

Vestri er með fjögur stig en Þórsarar eru með níu stig. Fyrsti sigur Vestra í deildinni og fyrstu töpuðu stig Þórsara.

Þórsliðið í heild, enginn sem á skilið að vera tekinn sérstaklega fyrir. Vondur dagur fyrir tuðara.

Rautt spjald réttur dómur að ég held. Rétt að dæma markið af Jakobi vegna leikbrots. Rangstöðuna er ómögulegt að sjá en verðum að treysta AD1. Appelsínugult var það svo þegar Ivo braut á Alvaro, alltof seinn en mín fyrstu viðbrögð voru bara gult spjald. Stóru atvikin að mínu viti rétt (tökum rangstöðuna frá) til þessa. Á 83. mínútu stöðvar dómarinn leikinn þegar Blakala liggur eftir en áður en leikurinn var stöðvaður var Guðni, að mér sýndist, felldur. Það virkaði eins og vítaspyrna og mjög erfitt að skilja hvað Egill dæmir á. Ekki var boltanum skilað til baka eftir þetta atvik. Á 91. mínútu á Jónas svo skot að marki sem fer í hönd leikmanns Vestra sem steig til hliðar til að fara fyrir skotið. Egill virtist ætla að dæma víti en ætlar að sjá hvort Þórsarar skora úr næsta skoti en ákvað svo að dæma ekkert. Fyrir utan stóru atriðin: Flæði leiksins og hvernig það er tæklað er ekki boðlegt. Mín tillaga: Spjaldaðu Þórsara fyrir tuð og aðvaraðu gestina einu sinni almennilega og taktu svo hart á því þegar viljandi er verið að drepa leikinn.