Ólafsvíkingar voru heilt yfir sterkara liðið í dag en með örlítilli heppni hefði Magni náð í stig í dag.

Sigurmark Harley Willard. Indriði Áki á sendingu á Harley Willard eftir að Magnamenn höfðu hreinsað í tvígang frá eftir horn. Willard fékk boltann hægra megin við D-bogann. Willard fer á vinstri fótinn og skýtur í hægra markhornið, lúmskt skot framhjá einum eða tveimur varnarmönnum. Steinþór (Stubbur) í marki Magna virtist ekki eiga von á skotinu og boltinn rúllaði frekar hægt í netið.

Magnamenn eru áfram án stiga í botnsæti deildarinnar. Ólafsvíkingar sigruðu í fyrsta sinn á Grenivík og eru komnir með sex stig í deildinni.

Tveir Magnamenn fá þennan titil í dag. Kristinn Þór Rósbergsson virkaði eitthvað furðulega stilltur og fékk algjört dauðafæri skömmu áður en hann svo jafnar leikinn úr vítaspyrnu. Nokkrar slakar ákvarðanir við teiginn. Hinn leikmaðurinn er Helgi Snær Agnarsson sem hljóp að venju mikið og það vantaði ekker upp á dugnaðinn. Það virtist sem svo gott sem engin snerting hafi fallið með Helga sóknarlega í dag og því verður þetta að teljast sem vondur dagur.

Frammistaðan var upp á áttu í dag hjá Helga Mikael en hann var sannfærður um að Ólafsvíkingar áttu að fá víti þegar Indriði Áki snertir boltann, Gauti fer svo næst í boltann og í kjölfarið fer Gauti í Indriða. Þeirri ákvörðun er ég ekki sammála.