Þetta var mikill baráttuleikur og hart tekist á um allan völl. Bæði lið vildu vinna en skorti gæði á síðasta þriðjungi til að finna sigurmark. Dómarinn átti svo líka sinn þátt í úrslitunum þar sem hann tók mögulega mark og vítaspyrnu af heimaliðinu.

Í jöfnum baráttuleik standa undarlegar ákvarðanir dómarans því miður upp úr. Atvikið sem talað er um eftir leik er þegar dómari leiksins flautaði aukaspyrnu í stað þess að leyfa Aftureldingu að klára dauðafærið sitt.

Keflavíkurkonum mistókst að tylla sér í toppsætið. Þær eru í 2. sæti deildarinnar, tveimur stigum á eftir toppliði Tindastóls. Afturelding lyftir sér upp í 4. sætið, er með 8 stig, rétt eins og Haukar en betri markatölu.

Framlína Keflavíkur olli mér vonbrigðum í kvöld. Voru að spila vel undir getu miðað við hvað þær hafa sýnt fyrr á tímabilinu. Vantaði uppá ákvörðunartökuna jafnt sem áræðnina. Svona gæðaleikmenn eiga að gera betur.

Dómarinn átti því miður slæman leik í kvöld og réði illa við leikinn. Mér fannst dómgæslan afar tilviljanakennd og ósannfærandi. Bæði lið voru ósátt en heimakonur lentu verr í því. Það var tekið af þeim mark þegar dómarinn var of fljótur á sér og flautaði aukaspyrnu í stað þess að beita hagnaðarreglunni og leyfa marki Kristínar Þóru, leikmanni Aftureldingar, að standa. Þá átti Afturelding að öllum líkindum að fá vítaspyrnu eða í það minnsta aukaspyrnu á vítateigslínunni um miðjan seinni hálfleikinn. Ekki nógu gott.