Eftir ansi dapran fyrri hálfleik færðist fjör í leikinn í þeim síðari. Bæði lið fengu færi þó svo að gestirnir úr Hlíðunum hafi haldið betur í boltann og heilt yfir haft yfirhöndina í leiknum. Selfyssingar vörðust vel og voru mjög skipulagðar í sínum leik. Það voru síðan gæði Dagnýjar og Hólmfríðar sem skinu í gegn í markinu sem tryggði farseðil í undanúrslitum.

Vítaspyrnan undir lok leiks. Elín Metta fær tækifæri til þess að koma leiknum í framlengingu en Kaylan sagði: Takk, en nei takk.

Bikarmeistararnir eru komnir í undanúrslit Mjólkurbikarsins. Markmiðið fyrir tímabilið var skýrt, að vinna titil. Markmiðið lifir!

Elín Metta Jensen sættir sig væntanlega ekki við sína frammistöðu í kvöld. Hún getur miklu, miklu betur og veit það best sjálf. Klúðrar víti og nær sér bara alls ekki á strik.

Ég get ekkert sett út á dómaratríóið í kvöld. Stóru ákvarðanirnar upp á tíu. Brot hér og þar út á velli sem þjálfararnir voru ekki sáttir við en að mínu mati var Jóhann og hans menn með þetta allt í teskeið.