Leikplan Víkinga gekk fullkomlega upp í fyrri hálfleik. Þær lágu vel til baka og lokuðu á helstu ógnir Haukaliðsins á sama tíma og þær voru mjög skeinuhættar í skyndisóknum. Haukar komust betur inn í leikinn í síðari hálfleik en áttu í vandræðum með að skapa sér opin marktækifæri gegn þéttum Víkingum.

Rut Kristjáns kom Víkingum í mjög þægilega stöðu með fallegu marki á 35. mínútu. Hún vill hafa mörkin sín falleg og skoraði með laglegu skoti rétt utan teigs.

Víkingar vinna langþráðan sigur og fá 3 mikilvæg stig. Stig sem lyfta þeim upp í 6. sætið á markatölu. Haukar dragast hinsvegar aftur úr í baráttunni um sæti í efstu deild. Þær eru nú 7 stigum á eftir Keflavík en eiga leik til góða.

Haukaliðið var alveg úr takti í fyrri hálfleik en komst heldur aldrei á almennilegt flug í þeim síðari. Það skrifast á liðsheildina en í svona leikjum er mikilvægt að elstu og reyndustu leikmenn liðsins stígi upp og ég saknaði þess að sjá nokkur töfrabrögð frá Vienna Behnke sem er á góðum degi einn besti leikmaður deildarinnar.

Eftir að hafa farið yfir málin eftir leik virðist tríóið hafa haft rétt fyrir sér í vítadóminum snemma leiks en ég skrifaði í textalýsingunni að mér hefði fundist það "soft". Ég er hinsvegar handviss um að Haukar hafi átt að fá víti í seinni hálfleik. Set svo spurningarmerki við það að uppbótartími hafi aðeins verið 3 mínútur í leik sem var stopp í að minnsta kosti 2 mínútur vegna meiðsla leikmanns auk þess sem hann var stoppaður fimm sinnum til að gera skiptingar. Þetta með uppbótartímann var vissulega ekki neitt risaatriði en skiptir samt máli og ég skil pirring gestanna.