Fínn fyrri hálfleikur dugði Keflvíkingum í dag. 2-0 yfir eftir fyrstu 45 en hefðu að ósekju mátt vera allavega 4-0 yfir miðað við færin sem fóru forgörðum. Á hinn bóginn vantaði sannfæringu í lið Leiknis þegar þeir tóku leikinn yfir í siðari hálfleik og eftir gott spil upp völlinn vantaði brodd fremst og kannski bara grimmdina að ætla sér að klára færið sem bauðst en þess í stað endaði síðasta sending yfirleitt hjá varnarmanni Keflavíkur. Heilt yfir líklega sanngjarn sigur Keflavíkur en á móti kemur að betra lið eða lið með meira sjálfstraust hefði líklega refsað þeim fyrir að fara illa með færin í fyrri hálfleik.

Á 77.mínútu fær fyrirliði Keflavíkur Magnús Þór Magnússon boltann í hendina í teignum. Leiknismenn vildu víti en Elías ákvað að flauta ekki. Skal ekki segja um það en stórt atvik sem vissulega hefði getað breytt útkomu þessa leiks.

Keflavík heldur toppsætinu og 1 stigs forskoti á Leikni R, og Fram. Eiga þó enn leik til góða á heimavelli gegn Grindavík og þurfa 6 stig úr þeim þremur leikjum sem þeir eiga eftir til að tryggja sætið í Pepsi Max endanlega.

Joey Gibbs sem gat ekki hætt að skora lengi vel í mótinu reimaði ekki á sig markaskónna í dag. Fór illa með nokkur færi sem ég er handviss um að hann hefði sett í netið á öðrum degi. Markametið færist fjær en honum er eflaust skítsama enda stigin þrjú Keflavíkur í dag.

Elías átti bara allt í lagi dag. Það var pirringur á vellinum og menn hátt gíraðir en hann leysti það ágætlega.