Þetta var í raun bara ótrúlegur leikur. Það var þannig séð ekki mikið að frétta í fyrri hálfleik þangað til Óskar Örn sýnir mikla snilli og kemur KR yfir á lokasekúndunum. KR byrjar seinni hálfleikinn af miklum krafti og kemst í 3-0, en svo vaknar Valur úr roti og þá er erfitt að eiga við þá. KR virðist ekki höndla pressuna, gefur þeim mörk og Valur nær að jafna. Valur vinnur svo í vítaspyrnulottóinu.

Ég verð að skrá það á þriðja markið sem Valur skorar. Ægir Jarl með slaka sendingu sem Patrick Pedersen kemst inn í. Boltinn endar svo hjá Sigga Lár sem var aleinn. Hjalti brýtur á honum og Patrick skorar á punktinum. Valur fullkomnaði þar endurkomu sína.

Valur er komið í undanúrslitin í Lengjubikarnum á meðan KR fer í æfingaleiki fram að móti.

KR-ingar voru sjálfum sér verstir. Kristinn Jónsson gefur fyrsta markið, Beitir Ólafsson á mjög slaka sendingu í þriðja markinu og Ægir Jarl á slaka sendingu í aðdraganda þriðja marksins. Mér fannst ekki einhver einn leikmaður vera ömurlegur heilt yfir en þetta hrun hjá KR á síðasta hálftímanum var alls ekki gott og þetta voru bara einstaklingsmistök í rauninni sem bjuggu til þessi mörk.

Mér fannst Ívar Orri tækla þennan leik bara mjög vel. Það var hiti í þessu og hann spjaldaði bara þegar þurfti að spjalda. Valur átti að mögulega að fá víti í seinni hálfleik en það var ekki mikið kvartað yfir því. Heilt yfir var þetta mjög vel dæmdur leikur.