Einstaklingsgæði leikmanna Selfoss voru meiri en einstaklingsgæði leikmanna Þór/KA. Gestirnir bjuggu yfir meiri líkamlegum styrk heldur en heimakonur og fannst mér það vega þungt á lykilaugnablikum

Fyrra mark Selfoss. Eftir að hafa séð það aftur þá er ég eiginlega viss um að ekki sé um brot að ræða. Brenna Lovera kemur á hárréttu tempói inn í návígi gegn Huldu Björg sem var sýnilega svekkt með að ekkert var dæmt. Þetta mark kom upp úr einni langri sendingu frá Fríðu, Brenna sýndi gæði sín og kláraði.

Selfoss er í toppsæti deildarinnar og fer inn í Draumaland með fullt hús stiga eftir tvo útileiki. Þór/KA er með þrjú stig.

María Catharina Ólafsd. Gros og Karen María Sigurgeirsdóttir fá að deila þessari mjög svo leiðinlegu nafnbót. Áttu í erfiðleikum í stöðunni einn á einn og Karen María komst ekki í takt við leikinn fyrr en í stöðunni 0-2. Til að slá í einn góðan varnagla þá fór ég í leikinn með væntingar um að þessar tvær myndu sýna mér gæði sín en ég sá þau ekki nægilega oft.

Eiður Ottó átti að mínu viti mjög flottan leik og fannst mér hann taka rétta ákvörðun í markinu, að dæma ekki brot. Hann líka lét bekkina vita að það væri ekki í boði að tuða endalaust og er það vel.