Grimmd Leiknismanna og yfirvegun. Sviðsskrekkur hjá þeim í byrjun en eftir því sem á leikinn leið jókst sjálfstraust þeirra og áræðni og þeir sigldu þremur stigum í húsi í kvöldsólinni í póstnúmeri 111.

Það voru mörg atvik til að ræða, mörk voru dæmd af báðum liðum og það að forysta FH dugði í tæpa mínútu en vítið hlýtur að vera stóra atvikið. Árni var kominn langleiðina inn í markteiginn í dauðafæri og Baldur gerði lokatilraun til að komast í veg fyrir skotið en Árni féll við tæklingu Baldurs og Pétur dæmdi víti. Það réð úrslitum.

Bæði liðin halda þeim sætum sem þau voru í fyrir leik en nú munar bara 2 stigum á þeim. FH færist aftar í toppbaráttunni en Leiknismenn eru að slíta sig úr botnslagnum.

Ekki hægt að taka neinn einn út úr FH-liði sem einhvern veginn koðnaði niður eftir 22 mínútur af fínni frammistöðu. Matthías Vilhjálmsson hitti líklega naglann á höfuð í viðtali eftir leik þar sem hann talaði um að það sé orðið tabú í boltanum að menn eigi að berjast. Það var engin barátta í FH í kvöld, sér í lagi í seinni hálfleik og af því þarf liðið að læra.

Eins og áður er sagt voru margar ákvarðanir sem hægt væri að kalla stórar og afdrifaríkar. Það var samt í öllum tilvikum þannig að lítið var um ergelsi á meðal leikmanna og leikurinn flaut áfram hjá Pétri og aðstoðarmönnum hans í fínu tempó og línan var skýr.