Þróttarliðið stóð af sér þunga pressu Stjörnunnar í upphafi leiks og vann sig vel inn í leikinn. Liðið nýtti tækifærin sín og leiddi 2-0 í hálfleik. Í síðari hálfleiknum tóku gestirnir öll völd á vellinum og bættu við þremur mörkum, þar af tveimur eftir hornspyrnur. Virkilega sannfærandi frammistaða hjá Þrótti á meðan ekkert gekk upp hjá Stjörnunni eftir liðið var komið tveimur mörkum undir. Fram að því voru Stjörnukonur vel inn í leiknum og ekki síðri aðilinn á vellinum.

Ólöf Sigríður eða Olla Sigga stal senunni á kafla í fyrri hálfleik. Á milli þess sem hún skoraði fyrsta mark leiksins og fékk dæmt vítið sem kom Þrótti í 2-0 bjargaði hún nefnilega á marklínu. Nóg að gera hjá framherjanum snjalla.

Stjörnukonur ná ekki að fylgja eftir sterkum sigri í síðustu umferð en Þróttarar fagna sínum fyrsta sigri. Stigin þrjú lyfta liðinu upp í 4. sæti, að minnsta kosti í bili, og sjálfstraustið eykst.

Það fór allt í skrúfuna hjá Kristjáni Guðmunds og lærimeyjum hans. Stjörnuliðið byrjaði vel en átti engin svör þegar Þrótturum óx ásmegin. Ofboðslega slakt hjá Garðbæingum þegar allt kemur til alls.

Virkilega góð frammistaða hjá Elíasi og hans aðstoðarmönnum og afar gleðilegt að horfa á svona vel dæmdan fótboltaleik. Frammistaða tríósins gefur vonandi góð fyrirheit fyrir aðra leiki 5. umerðar.