Augnabliksgæði og hellingur af heppni réði úrslitum því boltinn hefði allt eins getað fokið eitthvert í annars frábæru spili fyrir mark Grindavíkur sem nýtti eitt færi á meðan að Selfoss nýti ekkert.

Innköstin voru farin að nálgast hundraðið ískyggilega mikið. Hugsa að boltinn hafi verið fyrir utan hliðarlínu í að lágmark 30 af 90 mínútum leiksins sem er nokkuð vel í lagt.

Grindavík lyftir sér upp í þriðja sæti deildarinnar þremur stigum á eftir toppliði Fram sem á leik til góða en einu stigi á eftir liði Fjölnis sem situr í 2.sæti. Selfoss færist niður í 11.sætið á markatölu eftir jafntefli Gróttu og Þróttar.

Fótboltinn átti vondan dag. Það er borin von að lið ætli sér að spila skemmtilegan fótbolta þegar svona viðrar og þrátt fyrir að við búum í landi þar sem allra veðra er von er það ekki boðlegt að bjóða leikmönnum né áhorfendum upp á svona aðstæður. Það tekur að miklu leyti ánægjuna út úr leiknum þegar boltinn fýkur út um allar trissur og áhorfendur skjálfa á beinunum í stúkunni af kulda.

Elli gerði sitt af fagmennsku í dag. En menn leiksins hljóta að vera aðstoðardómarar hans. Þeir verða með harðsperrur í handleggjunum á morgun svo mikið er víst.