KA menn skoruðu. HK ekki. Mikið jafnræði var með liðunum og lítið um opin marktækifæri. Heimamenn skoruðu fyrra markið þegar að gestirnir höfðu aðeins verið að sækja í sig veðrið og má segja að svipað hafi verið uppá teningnum þegar að Daníel Hafsteinsson skoraði síðara mark KA. Eftir það var ekki mikil trú á verkefninu og KA menn sigldu sigrinum örugglega heim.

Negla Daníels Hafsteinssonar. Það kláraði leikinn og markið var í hæsta gæðaflokki.

KA er áfram í 5. sætinu en fara í 20 stig, þremur stigum frá Víkingum sem að verma 2. sætið. Þeir mæta Leikni R. í Breiðholtinu í næstu umferð. HK sitja í næst neðsta sæti deildarinnar með 10 stig, tveimur stigum frá öruggu sæti. En FH, sem eru sæti ofar, eiga tvo leiki til góða á HK. Brynjar Björn og hans menn fá Valsara í Kórinn í næsta leik.

Sóknarleikur beggja liða var ekki beint flæðandi í dag. Bæði var völlurinn erfiður og ákaflega heitt úti. Í restina voru ansi margir leikmenn orðnir örþreyttir í löppunum. Það virtist sem að HK ætti hreinlega ekkert eftir á tankinum til að koma til baka í leiknum.

Ekkert út á Egil að setja. Líklega ekki erfiðasti leikur sem hann hefur þurft að dæma.