Þórsarar völtuðu yfir Gróttu á 13 mínútna kafla í fyrri hálfleik. Þar skoruðu heimamenn þrjú mörk og gestirnir áttu í raun ekki möguleika eftir það. Björn Axel Guðjónsson fékk frábært færi til að jafna leikinn í 1-1 andartaki eftir að Ásgeir Marinó hafði komið Þór yfir en í stað þess kom Jóhann Helgi heimamönnum í 2-0. Eftir það misstu Gróttumenn hausinn og í raun aldrei spurning hvoru megin sigurinn myndi lenda, þrátt fyrir tvö mörk Gróttu í síðari hálfleik.

Glæsimark Fannars Daða. Sýndi hraða, styrk og yfirvegun í aðdraganda marksins.

Þór stökkva upp fyrir Gróttu og fara í 6. sætið með 19 stig, þremur stigum frá 3. sætinu. Lengra er þó upp í 2. sætið sem Eyjamenn verma, eða 7 stig. Þeir fá topplið Fram í heimsókn í næstu umferð og mæta Safamýrarliðinu fullir sjálfstrausts. Seltirningar kíkja á Vestfirði í næstu umferð og spila þar gegn Vestra. Grótta situr nú í 8. sæti Lengjudeildarinnar.

Gróttumenn munu vilja gleyma þessum fyrri hálfleik sem fyrst. Náðu ekki að opna Þórsvörnina af neinu viti og misstu algjörlega hausinn þegar þeir lentu 2-0 undir. Þeir hættu algjörlega að pæla í því hvernig væri best að koma sér aftur inn í leikinn og hugsuðu heldur mikið um Gunnar Odd dómara, ásamt því að pirra sig á mótherjanum.

Gekk áfallalaust fyrir sig í dag hjá Gunnari.