Þórsarar voru líklegri í upphafi leiks en fá mark í bakið eftir 20 mínútur. Þetta var frekar bragðdauft þangað til Selfyssingar gera breytingu og bæta marki við. Seinni hálfleikur var bara eins og svo margir á Þórsvelli. Þórsarar með yfirhöndina en ná ekki að skapa sér neitt fyrr en seint í leiknum.

Jóhann Helgi skoraði mark á 92. mínútu sem var dæmt af vegna rangstöðu. Undirritaður sá það ekki alveg og það tók smá tíma fyrir dómarana að komast að þessari niðurstöðu.

Selfyssingar lyfta sér upp um eitt sæti, uppfyrir Aftureldingu í 8. sætið. Þórsarar geta farið pressulausir inn í síðasta leikinn gegn Þrótti þar sem liðið getur ekki fallið.

Það gengur ekkert hjá framlínu Þórs að skora! Fannar Daði tók alltof margar rangar ákvarðanir, Jóhann Helgi var mjög óheppinn, skoraði tvö mörk sem voru dæmd af honum og kom sér í góðar stöður en inn vildi boltinn ekki. Ásgeir var eiginlega alveg týndur.

Bara fínn leikur. Það eru bara þessi tvö margumræddu mörk. Það er alltaf hasar inn í teignum og í dag ákvað hann að dæma á sóknarmann. Ég get ekki dæmt um rangstöðuna, það var erfitt að átta sig á því hvað var í gangi þar.