Byrjum á því að hrósa vinnusemi Skagamanna sem var til fyrirmyndar í dag. Vörðu markið sitt með kjafti og klóm og lifðu mögulega á lyginni einni í eitt til tvö skipti í leiknum. Héldu það þó út og á réttu augnablik fá þeir rétta færið og nýta það.

Auðvelt að nefna sigurmarkið hér en ég verð að nefna ótrúlega björgun Tobias Stagaard á marklínu frá Nacho Heras þegar um korter var eftir. Hefði sá bolti legið í netinu er ég ekki viss um að Skagamenn hefðu haft kraftinn í að koma til baka.

Skagamenn eru ekki á botninum lengur. Lyfta sér uppfyrir Leikni í 11.sætið með 15 stig. Gæti reyndar breyst ef Leiknir tæki upp á því að taka stig af Blikum. Keflavík situr í því áttunda með 22 stig.

Framlína Keflavíkur. Virðist fyrirmunað að skora og eru í basli við að koma sér í færi líka. Patrik er vissulega mikilvægur liðinu en ef liðið getur ekki skorað án hans er illt í efni.

Engin risaatvik til þess að tala um í leiknum en talsverð harka og atvik sem hann hefði mögulega getað tekið betur á. Annars allt í lagi hjá Sigurði sem hefur þó átt betri daga.