Ótrúlegar lokamínútur þar sem KA gekk á lagið í eina skiptið í leiknum. Þeir voru búnir að vera frekar bitlausir sóknarlega og Fram liðið nokkuð beitt í seinni hálfleiknum en 2 fín færi sem KA fær í lokin voru nóg til að stela stiginu.

Jöfnunarmark KA var virkilega dramatískt. Leikmenn KA voru nokkrir þétt saman við hornið á teignum að reyna spila sig inn í færi og þegar Jakob fær boltan færir hann boltan aðeins út til að skapa sér hálf færi og kemur með lúmskt skot í fjærhornið sem er bara það hnitmiðað að það fer inn.

KA heldur sér í 2. sæti stigi á undan Víking sem á leik til góða. Fram heldur sér einnig í 7. sæti og eru enn 3 stigum á eftir KR sem er í 6. sæti

Besti leikmaður KA á tímabilinu og besti leikmaður KA síðasta áratug fá því miður þennan dálk. Nökkvi Þeyr Þórisson og Hallgrímur Mar Steingrímsson áttu alls ekki sinn dag. Hallgrímur spilaði megnið af sínum mínútum sem fremsti maður og það gekk virkilega illa og Nökkvi reyndi eins og hann gat að koma sér í þær stöður sem við erum vanir að sjá hann í en var stöðvaður af varnarmönnum Fram trekk í trekk.

Helgi Mikael og hans teymi áttu fínan leik að mestu leiti. Þeir voru ekki að flauta á neitt of mikið en hann fer aðeins niður um einkunn vegna þess að það er togað í treyjuna á Sveini Margeir inn í teig þegar hann er að komast í fínt færi en vegna þess að hann lætur sig ekki detta þá er ekki dæmt. Það er leiðinlegt að sjá þegar leikmanni er refsað fyrir að vera heiðarlegur.