FH-ingar kláruðu leikinn hreinlega á fyrstu 10 mínútunum. Þær mættu alveg óðar á meðan Keflvíkingar voru bara ekki á staðnum virtist vera. Þrátt fyrir að Keflavík hafi náð að spila sig aðeins inn í leikinn voru þær aldrei neitt sérstaklega líklegar til þess að snúa stöðunni sér í vil.

Mark númer tvö frá FH kláraði þetta liggur við þrátt fyrir að það hafi komið á 8. mínútu. Auðvitað var fyrsta markið kjaftshögg en það er einhvern veginn auðveldara að setja undir sig hausinn og reyna að halda áfram í 1-0. En Keflvíkingar voru svo slegnir út af laginu eftir mark númer tvö að ég hef sjaldan séð annað eins og það er hreint út sagt ótrúlegt að FH hafi ekki verið allavega 4-0 yfir eftir fyrsta korterið.

FH-ingar sækja sinn fyrsta sigur og jafna stigafjölda Keflavíkur. Selfyssingar eru einnig með fjögur stig en þessi þrjú lið sitja í 7.-9. sæti í deildinni þegar að fjórar umferðir hafa verið spilaðar.

Varnarleikur Keflavíkur í upphafi leiks var alveg hrikalegur og eins og áður segir voru þær stálheppnar að vera bara 2-0 undir í hálfleik. Eins og áður segir náðu þær aðeins að vinna sig aftur inn í leikinn en það var bara of seint í rassinn gripið. Fæ líka að nefna veðrið en mér fannst bara ekkert fyndið hvað það var kalt í dag.

Helgi Ólafsson og hans teymi flottir í dag. Mér fannst hann leyfa leiknum að ganga og var ekki að falla í gryfjuna að dæma á litlar dýfur og slíkt.