Ástæðan fyrir því að Björgvin Stefánsson er utan hóps í dag er agabann. "Hann er í agabanni, ekkert meira um það að segja" sagði Rúnar Kristinsson við Stöð 2 Sport fyrir leik. Samkvæmt okkar upplýsingum var Björgvin boðaður á fund með Rúnari Kristinssyni fyrr í dag og honum tilkynnt að hann yrði ekki í hóp.

Það eru engir krakkar að fara að leika sér í kvöld. Meðalaldur KR-byrjunarliðsins er 29,6 ár. Meðalaldur Vals 28 ár.

Siggi Helga mættur með kaffibolla, Stefán Árni Pálsson stjörnublaðamaður búinn að koma sér fyrir við hlið mér, Byssan og Bogi Ágústsson mættir í KR-útvarpið og Tómas Þór og Benni Bóas búnir að versla við Fish and Chips vagninn. Allt eins og það á að vera á meðan liðin hita upp!

Við skulum fá spámenn til að rýna í þennan leik:

Tómas Þór Þórðarson, áhorfandi: 2-0 sigur Vals.

Kristján Jónsson, mbl.is: 0-0.

Hallbera Guðný Gísladóttir: KR 1-2 Valur. KR-ingar koma eflaust dýrvitlausir í þennan leik og eiga harma að hefna eftir leik liðanna á Hlíðarenda í fyrstu umferð. Valsararnir eru hinsvegar komnir á gott skrið og vinna þennan leik 2-1 þar sem Patrick Pedersen verður með bæði mörk Vals. Pálmi Rafn skorar fyrir KR.

Byrjunarliðin eru komin inn.

Björgvin Stefánsson er ekki í leikmannahópi KR í dag. Frá 0-1 tapinu gegn Víkingi í síðustu umferð fer Pablo Punyed á bekkinn. Kennie Chopart og Skúli Jón Friðgeirsson koma inn í byrjunarliðið.

Valur gerir eina breytingu frá 2-0 útisigrinum gegn Keflavík í síðustu umferð. Haukur Páll Sigurðsson kemur aftur inn í liðið en fyrirliðinn var lítillega meiddur í síðasta leik. Ólafur Karl Finsen fer á bekkinn.

Hann er ansi eftirminnilegur leikurinn milli þessara liða í fyrstu umferðinni. KR-ingar lögðu allt kapp á varnarleikinn en lentu undir þegar Dion Acoff skoraði. Pálmi Rafn Pálmason jafnaði í uppbótartíma og KR-ingar voru enn að fagna þegar Valsmenn geystust í sókn og Tobias Thomsen skoraði sigurmarkið! 2-1 sigur Valsmanna.

Lögregluvarðstjórinn Pétur Guðmundsson dæmir leik kvöldsins. Aðstoðardómarar eru Gylfi Már Sigurðsson og kjötiðnaðarmaðurinn ástsæli Jóhann Gunnar Guðmundsson. Helgi Mikael Jónasson heldur á skilti.

KR gengur illa með Óla Jó:
Ólafur Jóhannesson hefur náð í 14 stig af 21 mögulegu gegn KR frá því að hann tók við Val og slegið þá einu sinni út úr bikarnum. Vinir mínir á Vísi birtu þessa áhugaverðu staðreynd.

Af heimasíðu KR: Mikið verður um dýrðir á KR-svæðinu í kringum leikinn. Fjölbreyttur matur verður í boði á svæðinu frá 17:45 en Fish & Chips vagninn og Vöffluvagninn verða á matartorginu fyrir framan KR-heimilið. Þá verða KR-hamborgarar að venju í boði inni í félagsheimili auk þess sem Bikarbarinn verður opinn frá 17:45.

Það er enginn HM leikur í kvöld og vonandi mun fólk fjölmenna í Frostaskjólið. KR-ingar hafa alls ekki staðið undir væntingum í sumar og eru í sjötta sæti með 13 stig. Eftir hikst í byrjun eru Valsmenn á kunnuglegum stað, efsta sætinu með 24 stig.

Góðan og gleðilegan daginn og verið velkomin með Fótbolta.net á ansi áhugaverðan leik KR og Vals í 12. umferð Pepsi-deildarinnar. Tveir leikir í umferðinni í kvöld, þrír á laugardag og einn á mánudag. Ágæt dreifing þar á ferð!