"Þá er að kynna liðin, í marki Víkinga stendur Andreas Larsen. Eða Andreas Schmeichel Larsen eins og við kjósum að kalla hann hér á heimavelli hamingjunnar" - Vallarþulurinn.

Pöntunin tókst! Kaffið er komið og það er sjóðandi heitt!

Hingað til hefur ekki klikkað að panta kaffi í gegnum textalýsingakerfið! Ef einhver starfsmaður Víkings rekst í þetta má láta skottast með eina könnu í fréttamannaklefann.

Fimmtán mínútur í leik og örfáar hræður mættar í stúkuna. Hef á tilfinningunni að það verði fámennt í kvöld... en örugglega góðmennt!

Rikki Té, Rick Ten Voorde, ekki með Víkingum í kvöld. Hann fór meiddur af velli í sigrinum gegn Fylki í síðustu umferð.

Vorum að fá þær upplýsingar að Kári hefði meiðst á æfingu í gær og sé því ekki leikfær í dag. Tognun.

Ekta íslenskt sumarveður. Skýjað, rigning og kalt. Vallarþulurinn með rigningarþema í tónlistarvalinu sínu. "Mér finnst rigningin góð" ómaði þegar ég mætti á svæðið.

Byrjunarliðin hafa verið opinberuð.

Kári Árnason er ekki í leikmannahópi Víkinga í kvöld en er skráður í liðsstjórnina. Mögulega eitthvað meiddur.

Guðlaugur Baldursson sagði í viðtali í vikunni að hann vonaðist til að þjálfarabreytingarnar yrðu innspýting fyrir liðið.

"Ég vona það. Það kveikir oft í liði að breytt sé um mann í brúnni. Þá gerast stundum hlutir og ég vona svo sannarlega að mínir menn nái fram fyrsta sigurleiknum á föstudaginn (gegn Víkingi). Ef menn taka fyrsta sigurinn fá menn blóðbragð í tennurnar og það gæti hjálpað í bardaganum. Það gæti gefið mönnum trú og von," sagði Guðlaugur.

Það komu stórar fréttir frá Keflavík í vikunni þegar Guðlaugur Baldursson sagði starfi sínu lausu vegna lélegrar uppskeru á tímabilinu. Aðstoðarmaður hans, Eysteinn Húni Hauksson, stýrir liðinu í kvöld.

Víkingar hafa unnið þrjá af síðustu fimm leikjum sínum og eru fjórum stigum frá fallsæti. Gleði á þeim bænum. Fáum við að sjá Kára Árnason í kvöld? Spennandi að sjá.

Keflvíkingar hafa verið í hrikalegu basli á tímabilinu og flestir eru búnir að dæma þá niður aftur í Inkasso-deildina. Liðið hefur ekki unnið leik, er aðeins með þrjú stig og heil níu stig eru upp úr fallsætinu!

Heil og sæl! Verið velkomin með okkur á hinn svokallaða 'heimavöll hamingjunnar" þar sem Víkingur Reykjavík og Keflavík eigast við í Pepsi-deildinni. Þessi leikur er hluti af 10. umferð deildarinnar.